العربه الماروتى

نظريا زميلاتى فى المكتب شكل تانى من البشر أو يمكن انا اللى مختلف مش بتاع جو البيتزا و سفريات مارينا و الحاجات دى ... ويمكن – واعتقد أن ذلك هو الصحيح – ان الفلوس بتغير فى البشر يعنى لما هى تقبض ثلاثة الاف جنية و المدير بيوصل الى ثلاثة الاف دولار يعنى متصور يكلوا من عند سعد الحرامى ولا يكون أخرهم القناطر و رغم كدة و عشان وسطة أختى جابت لى مكتب جنبهم يعنى من جاور السعيد يسعد و تناست أن 500 جنية – فضل ونعمة من عند ربنا طبعا – كان أصلهم 400 و الواسطة عاملة شغل - ممكن وليد كان يقبل بيهم !!! – و الى هذا فمن 9 الى 5 تقدر تقول مستمتع بحياة زائفة يتخللها شغل و مقابلات ولما أحب أتغدى يبقى فول و طعمية فى البوفية و اللطيف ان فى حد بشاركنى البوفية و قت الغدا مش مع طلبات البيتزا و رز ( اليزو ) و الجميل انها صاحبة الماروتى الزرقاء .
أفرح يا قلبى لك نصيب !! تنول مرادك .
البوفية واسع و فية كراسى جلد زى المكاتب و ترابيزة مخمسة كبيره يعنى ممكن ينفع مكان رومانسى لو وزعنا الساعى و أستثمرت وقت البريك صح .
فى اول يوم فات،طبعا ،لدراسه المكان وثانى يوم طبت أختى بأكل من البيت ،تالت يوم فى مشوار للشركه ، رابع يوم أكلت مع أهل البيتزا ( حبه تفاريح ) ، خامس و سادس كان أجازه ... لن أستسلم ، بلاش البوفيه ، نخليها فى العربه الماروتى أيام الارباع مكنش فى وقت ألا علشان اجرى للقاء الادباء فى الساقيه و الخميس علشان ألحق مغامير فى خالد بن الوليد و الجمعه و السبت أجازه
أكلمكوا بقى عن يوم الثلاثاء مكنش فى كلام بطبيعه الحال بس لما لقيتها ماسكه المقود فارده دراعتها بطريقه تبدو عصبيه أو متوتره قلت لها :
"أنتِ أتعلمتِ السواقة أمتى "
" فى أنجى كار"
" أى ... حاسبى المطب ... بقولك أمتى "
" أمتى .. من حوالى شهرين "
"أه ... أصل أنا لما تعلمت القياده كنت بمسك الدركسيون زيك كده ... الطريقه دى تسبب من توتر فكى الفرده دى"
" أنت أتعلمت القياده بتعرف تسوق يعنى "
" أيوه بس متقدريش تعتمدى عليا فيها لم أقود عربيه من أول ما تعلمت من ثلاث سنين"
وهكذا ... نقدر نقول بدايه طيبه ، فى تجاوب يعنى مش زى وشوش المكياج الى قاعده جنبى .
فى يوم تانى أطور الحوار الى سؤالها عن الكوفيه الشيك اللى لبسها " أصل زميلتى سهى عيد ميلادها قرب قلت الكوفيه دى تنفع هديه ... منين و بكام " قالت :" من محل جنب البيت و بـ155 جنيه "
الحقيقه كان معايا قبض - بس مش كتير 155 !!!- المهم بما أنها مروحه قلت يالا بينا و قد كان وإحنا فى الطربق سألتنى عن سهى – بشكل غير مباشر – و كأنى أنفتحت ، حكيت لها عن التكعيبه و الكتاب و الشعراء و القصص و ...
" قلمك حلو "
"أنتِ شفتى المدونه "
"مدونه...!!! أصلى كنت بقرا القصص الى كنت بتبعته لأختك لطباعتهم " أبتسمت
وكنا وصلنا المحل فى مدينه نصر و لحسن الحظ لى و لسوء الحظ لسهى كان المحل مغلق و معلق ورقه بيضاء صغيره مكتوب عليها "توفى الى رحمه الله والده الحاج محمد محمد بكر و العزاء بمسجد رابعه العدويه "
تيقنت أنه حظ سهى مش حد تانى.