ممكن أكون أنا

جالى التاج دا من د.زين أو زين أو أبوللو (أى حاجه المهم أنه

أجمل دكتور أسمرانى ) صاحب مدونه تسابيح وإجاباته هنا

وأنا جاوبت بكل صراحه وياريت يعجبكو

أبدُ كما أنت، أو كن كما تبدو

جلال الدين الرومي

#####################

هواياتي

لا أعتقد هناك شيئ محدد
حتى القراءه والكتابة أصبحوا ألان ليسوا من ضمن هواياتي، بل دخلوا في كونهم أساس لمستقبلي الادبى بالاضافه أنى أمارسهم طوال الوقت وليس في أوقات الفراغ (كالهوايات) وبشكل ما أمارسهم كمهنه وأعلىّ من شئنهم في حياتي على حساب شغلي
و
الجواله والكشافه كانت من هواياتى أيام الجامعه وثانوى وكمان كنت بصدر مجله من أربع أو خمس صفحات A4 على مكن تصوير الكليه وأوزعهم على أصحابي، الانترنت برضو كان من ضمن هواياتي لكن دخل في نفس النطاق مع الكتابة والقراءه

أشهر عيوبي

كلمه أشهر هي اللي هتخلينى أقول عن عيوبي، أصلها كتير ولو قلتها يمكن تكرهونى، فهركز على أشهرها
مش عارف أصنفها من أى جانب
( برمى كلام زى الدبش )( مش إجتماعى)( صريح زيادة عن اللزوم)
لكن أنا ممكن أقول ( يا جماعه، هي طريقه تفكيري كدا)
مثلا :قابلت مشاكل مع أمي وأخوتي البنات، ولم يمل أصدقائي من تكرار أنى ممكن أحل مشاكلي معاهم "بكلمتين حلوين" و"أكل بعقلهم حلاوه" و"أمشى أمورى"، أهدى شويه وبعد كدا أتربس دماغي وأقول رأيى بدون ورق سوليفان، زى الدبش واللي يزعل ينفلق من الآخر يعنى، مش ناقصة وجع دماغ وتزويق كلام

حاجات بكرها جدا

لو وصلت لدرجه الكره يبقى حاجه واحده أن حد يفهمني غلط، لما أتصرف بحسن نية وبهدف لمصلحته فلا يعجبه كلامي فيؤوله ويقول أنه من كلام غيري وأنا بقلده مثلا
طب يأخد كلامي ويرميه البحر، مش هزعل ، والله ما هزعل
بس يتهمنى بأتهامات باطله ويبقى سنين أمه سودا لو عرفت أنه قاصد ينرفزنى بتأويلاته هذه
بالنسبة لحاجات مقاطعها التلفزيون والجرائد الحكومية والتدخين( الحشيش لأ)

حاجات مؤمن بيها

إيه السؤال السخيف دا ، دنا عامل المدونه دى وأسمها اللى مسببلى مشاكل عشان كرهت الايمان بالاشياء، عادا الدين

الحمد لله أنا مسلم و موحد بالله

حاجات بحبها قوى ومش بمل من تكرارها

القراءه ثم القراءة ثم القراءه فالكتابه
أه ... وحاجه كمان
الصحبة والأصحاب في السفر وعلى المقاهي
وأخيرا
الرز باللبن(إللى عاوز يأخذ عيني ويضحك عليا يأكلني أرز باللبن من عند المالكي)

تصدقوا أنا ريقى جرى على طبق رز بلبن دلوقت، جرى على المالكى

سؤال يستفزني جدا

لقد أتممت ثلاثون عاما منذ بضعه أيام يعنى من مواليد برج الثور ومن صفاته أنه صعب جدا حد يستفزه والروائي فتحي أمبابى يقول أن عندي قدره على امتصاص الآخرين يحلوهم وشرهم ويمكن الرجوع إلى الحاجات اللي بكرها

أمنيتي في الحياة

أن أكون كاتب قصه محفور أسمه في ذاكره الناس كلها والحياة

أكتر حاجه فاشل فيها

دراستي في كليه العلوم قسم كيمياء وفيزياء، أنا متأكد أن دي أكتر حاجه فاشل فيها
إدارتي لمزرعة دواجن ( هما بيقولوا عليا فشلت فيها بس أنا مش مهم عندي أصدقهم)

وظيفه بحبها

الوظيفة اللي شغال فيها دلوقت وهى باختصار أطمح أن يكون الكاتب نجم سيما

وقراءه الكتاب تبقى زى شراء تذكره سيما ومشاهدة فيلم

مثلي الأعلى في الحياة

مريت بناس كتير ممكن يكونوا مثل أعلى ولكن لا أحد وضعته نصب عيني ليكون مثلي وهذا ليس عيبا فيهم ولكن لا أريد أن يكون أحد أستاذ لىّ حتى لو كان ماركيز نفسه

همرر التاج ل

الصديقة طيبه صاحبه مدونه صحرا

والصديقة هند صاحبه مدونه تصدعت المرآه

والصديق البنهاوى كريم صاحب مدونه كريم بهى

والصديقة الفيسبوكيه أميره بهى الدين صاحبه مدونه ياما دقت على الراس طبول

والصديق محمد صاحب مدونه محمد رفيع